Aussifoan…
© Eva Brigitta Gebetsroither 2017
Es is scho a Zeitl hea, da hab i ma docht,
i wü aussi, die Welt entdecken,
was Neichs segn.
Gschafft hab is bis nach Italien,
dass i ned so weit weg bin von Dahoam,
hab i ma docht.
OBA gfiacht hab i mi, voam Zugfoan,
weils doch
so weit weg is…
Was dengan sie woi die Flüchtling, wanns in a
Boot steign?
Oba i woa jo aloa! Des erste Moi in meim Leben.
An Platz zum Schlofn hab i ghobt,
des woa in so am Studentheim
und liab aufgnuma hams
mia a
Obwoi, amoi, wias moi
wem wos gstoin ham
Dan hams mi glei verdächtigt.
Do hob i ma docht, i bin im foischn Film
Na, i woa einfach nua im foischn Land…
Da hab i mi des easte moi gfragt,
Is ma a woanders fremd?
a wanst a super Österreicher bist,
wo de Leid e so nett san.
Nua wam ma fremd is, dann zöht des ned
A Schas, wanns in de Nachrichten de ganze Zeit
vom Kriag dazöhn,
Da kann ma nu so nett sein,
ma is doch irgendwie immer dea Böse
Oba andas ois bei mir, san de Leid ned
freiwüllig ganga,
oba ham wüs do a kana.
Des muasst da moi voastöhn wias die do fühst,
mit am Baby im Bauch, 2 Kinder an deiner Hand und
an Man, wost ned wast wo dea is… geschweige
der Rest von deiner Famülie
…
I hab ma dann in Italien amoi a SIX PACK
Mineralwasserfloschn kauft,
weil mans Wasser ja ned trinken kann.
Aber hamschleppn hab is miassn. I sags glei,
do is ma de Kraft ausganga
Dann woa do so a netta
Italiener,
dem Woit is schenken,
Ja immer nu gscheita ols einfach steh lossn.
Dea had mi agschaut, mit soiche Augn, ob i vom
Mond kema wa.
Ja was de Leid ned kenan, des fressens ned,
und in dem Foi hat a de Österreicherin ned
kennt.
Oba weggramt hat as Mineralwasser zumindest,
damits ned ubadumsteht. Ob as dan a drunga
hot?
I was ned, weil wea was, wos i do eine da hab,
Drogen oder so?
Oder vielleicht einfach zvü Kohlensäure?
Na gfreit hot a si ned da Italiener,
aber
dafür meine Leid, de i dann de Gschicht dazöht hab.
….
Wia i amoi in da
Bibliothek wos ausboagn woit
Hama di richtigen Worte gföht.
So ganz zufrieden woans ned mit mia
Woa ischo 2 Monat in Italien und i kann imma nu ned de Sproch
Jo so hättns a boa Politiker a gern bei uns.
Am besten Kopfhörer aufsetzten und die Sprach
im Schlof leana
Oba so spühts sis ned
A boa Freind hob i in Italien dann doch
gfunden,
de sie mia daboamt ham
und mit da Sprach woas dann a glei leichter
Nua de Grenzn im Kopf san bliebn, zumindest
bei de andan
A noch am hoibn Joa im Ausland, hams immer nu
des Gsicht vazogn.
Aber des kommt von da Gschicht hea und ned von
de Menschen,
wie si d’Österreicher so aufgführt ham, wias
amoi duat woan. hab i ma zumindes
eingredt,
Jo de woan ned immer nua nett.
Oba ob und zua siagt ma nua de Masse und ned
des Individuum
Was a Fehler meines erachtens nach is, aber
wurscht!
Do frog i mi: „ I hob mein Horizont erweitert,
indem i moi aussi ganga bin“
De ham oba a so reagiert wie die meisten
Österreicher jetzt mit de Ausländer.
Soit ned jeda moi aus seine Grenzn ausbrechen
und die Welt anders segn?
Dann kann sie jeda moi bei da eigenen Nosn
nehmen,
und vielleicht amoi an Ausländer bei der Hand.